వాంఛ

పక్కింటి స్నానాల గదిలోకి
తొంగి చూస్తూ-
మా చెట్టు కొమ్మ!

నా తీరని వాంఛకు
బహుశా అది

ప్రతిరూపమేమో?

కుటీరం

తూర్పు,పడమర గోడలకు-
రెండు కిటికీలతో,
మాకొక
పన్నెండడుగుల గది మాత్రమే వుంది.

ఐతే ఏం?

ఆ కిటికీ దాటి,
ఈ కిటికీలో కనిపించడానికి,
సూర్యుడికి-
పన్నెండు గంటలు పడ్తుంది.

'హైడ్ అండ్ సీక్'

నలుగురమూ

ఒక్కో చోటు వెతుక్కుని,

రహస్యంగా దాక్కున్నాం.

మిగిలిన ఒక్కడూ-

ఎక్కడున్నామో మమ్మల్ని

కనిపెట్టాలి.

** ** ** **

నలుగురమూ

ఆ ఒక్కడ్నీ మోసుకెళ్ళి,

ఓ చోట దాచి పెట్టేసాం.

ఎక్కడున్నా, ఇక ఎప్పటికీ

వాడు కనిపించడు.