Monday, July 18, 2011
'సిక్స్త్ చాంబర్'
'సిక్స్త్ చాంబర్'
___________________
మా ఇంట్లోనూ
ఓ పద్మనాభుడి ఆలయం వుంది!
పంచేంద్రియాలతో పోగుచేసుకున్న
పాత జ్ఞాపకాల్ని-
కాలం ఇంకా లెక్క కడ్తూనే వుంది.
స్కూలు ఫీజు, పాల బిల్లు, ఇంటి అద్దె-
ఆంక్షల గోపురంపై నిలబడి,
ఓ కోడిపుంజు కూస్తూనే వుంటుంది.
తరతరాల దాస్య చేధనలో
లెక్క తేలనంత తారతమ్యం
తారాడుతూనే వుంది.
నా ఒంట్లోనూ
ఓ నేలమాళిగ వుంది
ఆశల్ని రాసులుగా పేర్చుకుని,
శతాబ్దాలుగా నిరీక్షిస్తోంది.
మూరెడు మల్లెపూలతో మురిపించే
దేహ సౌందర్యం మెరుస్తూనే వుంటుంది.
తలపుల తటాకాల్లో తెల్ల వెంట్రుక-
వెండి తీగలా అల్లుకు పోతోంది.
చూస్తుండగానే చుట్టూ పోగై పోతున్న
వాంఛల హర్మ్యాల క్రింద వర్తమానం-
ఒంటరి ఎత్తులు వేస్తూనే వుంది.
త్రవ్వుతూ వెళ్లేకొద్దీ-
దొరికే గతం నిండా,
బాల్యం బంగారుకొండల్లే నిలబడే వుంటుంది.
అరలకొద్దీ పేరుకు పోయిన
అనుభవాల దొంతరల్లో-
ఎప్పటికో గానీ ఓ నవ్వు
నీలి వజ్రమై వెలిగి పోతుంది.
దొరకని దానికోసం ఇప్పటికీ
జీవితం వెతుకుతూనే వుంటుంది.
ఇనుప గొలుసులతో లాగే బంగారు రధం-
ఎప్పటికీ వెనుకే వుంటుంది.
నా ఒంట్లోనూ
ఓ పద్మనాభుడి ఆలయం వుంది.
ఇంకా తెరుచుకోని ఆరో గదిలో-
మృత్యువు కాచుకు కూర్చుని వుంది.
Monday, July 4, 2011
'కొన్ని సందర్భాలు'
ఓ నెలబాలుడి హఠాన్మరణం-
ఇంకా నా గుండె గదిలో
దోగాడ్డం నేర్చుకుంటూనే వున్నాడు.
ఓ మిత్రుడు పోతూ..పోతూ
తన చేతి స్పర్శని
జ్ఞాపకంగా మిగిల్చి పోయాడు.
ఓ ప్రత్యూషం, నీడ ని
లాక్కెళ్ళి పోతుంది.
అప్పుడు అమ్మ లాగే-
చెట్టూ విధవ.
ఓ వృద్దుని ఆలింగనంలో
నా ముందు తరాల
ప్రేమ పరిమళం.
వెళ్తూ వెళ్తూ ఎక్కడో
బాల్యాన్ని పోగొట్టుకున్నాను.
ఎప్పటికో వెతికాక,
వణికే చేతికి ఓ
ఊతకర్ర దొరికింది.
Subscribe to:
Posts (Atom)